第八回：蓄深心动留红线盒 逞利口谢却七香车
罗子富正要朱蔼人摆庄，忽听得黄二姐低声叫「罗老爷」。子富不及豁拳，丢下便走。黄二姐在外间迎著，道：「阿要金凤来替耐豁两拳？」子富点点头，黄二姐遂进房到台面上去。子富自过对过房间里，祇见黄翠凤独自一个坐在桌子傍边高椅上，面前放著那一对金钏臂。翠凤见子富近前，笑说：「来㖏。」揣住子富的手捺到榻床坐下，说道：「倪无娒上耐当水，听仔耐闲话，快活得来！我就晓得耐是不过说说罢哉。耐有蒋月琴来哚，陆里肯来照应倪？倪无娒还拿仔钏臂来拨我看。我说：『钏臂末啥稀奇，蒋月琴哚勿晓得送仔几花哉！就是倪也有两副来里，才放来哚用勿著，要得来做啥？』耐原拿仔转去罢。隔两日，耐真个蒋月琴搭勿去仔，想著要来照应倪，再送拨我正好。」
子富听了，如一瓢冷水兜头浇下，随即分辨道：「我说过蒋月琴搭定规勿去哉。耐勿相信末，我明朝就教朋友去搭我开消局帐，阿好？」翠凤道：「耐开消仔，原好去个啘。耐搭蒋月琴是老相好，做仔四五年哉，俚哚也蛮要好。耐故歇末说勿去哉，耐要去起来，我阿好勿许耐去？」子富道：「说仔勿去，阿好再去嗄？说闲话勿是放屁。」翠凤道：「随便耐去说啥，我勿相信晚耐自家去想㖏，耐末就说是勿去，俚哚阿要到耐公馆里来请耐嗄？俚要问耐，阿有啥得罪仔耐了动气，耐搭俚说啥？阿好意思说倪教耐覅去嗄？」子富道：「俚请我，我勿去，俚阿有啥法子？」翠凤道：「耐倒说得写意哚。耐勿去，俚哚就罢哉。俚定归要拉耐去，耐阿有啥法子？」
子富自己筹度一回，乃问道：「价末耐说要我那价㖏？」翠凤道：「我说，耐要好末，要耐到倪搭来住两个月，耐勿许一干仔出门口。耐要到陆里，我搭耐一淘去。蒋月琴哚也勿好到倪搭来请耐。耐说阿好？」子富道：「我有几花公事哚，陆里能够勿出门口？」翠凤道：「勿然末，耐去拿个凭据来拨我。我拿仔耐凭据，也勿怕耐到蒋月琴搭去哉。」子富道：「故阿好写啥凭据嗄？」翠凤道：「写来哚凭据，阿有啥用场！耐要拿几样要紧物事来放来里，故末好算凭据。」子富道：「要紧物事，不过是洋钱啘。」翠凤冷笑道：「耐看出倪来啥邱得来！阿是倪要想头耐洋钱嗄？耐末拿洋钱算好物事，倪倒无啥要紧。」子富道：「价末啥物事㖏？」翠凤道：「耐覅猜仔倪要耐啥物事。倪也为耐算计，不过拿耐物事来放来里，倘忙耐要到蒋月琴搭去末，想著有物事来哚我手里，耐也勿敢去哉，也好死仔耐一条心。耐想阿是？」
子富忽然想起，道：「有来里哉，坎坎拿得来个拜匣，倒是要紧物事。」翠凤道：「就是拜匣蛮好，耐放来里仔阿放心？我先搭耐说一声，耐到蒋月琴搭去仔一埭，我要拿出耐拜匣里物事来，一把火烧光个㖏。」子富吐舌摇头道：「阿唷，利害哚！」翠凤笑道：「耐说我利害，耐也识差仔人哉！我做末做仔个倌人，要拿洋钱来买我倒买勿动㖏。覅说啥耐一对钏臂哉，就摆好仔十对钏臂，也勿来里我眼睛里。耐个钏臂，耐原拿得去。耐要送拨我，随便陆里一日送末哉。今夜头倒覅拨来耐看轻仔，好像是倪看中仔耐钏臂。」一面说，一面向桌上取那一对金钏臂，亲自替子富套在手上。子富不好再强，祇得依他，道：「价末原放来哚拜匣里，隔两日再送拨耐也无啥。不过拜匣里有几张栈单庄票，有辰光要用著末，那价？」翠凤道：「耐用著末，拿得去末哉。就勿是栈单庄票，倘忙有用著个辰光，耐也好来拿个啘。到底原是耐个物事，阿伯倪吃没仔了？」子富复沉吟一回，道：「我要问耐，耐为啥钏臂是覅㖏？」翠凤笑道：「耐陆里猜得著我意思。耐要晓得做仔我，耐覅看重来哚洋钱浪。我要用著洋钱个辰光，就要仔耐一千八百，也算勿得啥多；我用勿著，就一厘一毫也勿来搭耐要。耐要送物事，送仔我钏臂，我不过见个情；耐就去拿仔一块砖头来送拨我，我倒也见耐个情。耐摸著仔我脾气末好哉。」
子富听到这里，不禁大惊失色，站起身来道：「耐个人倒稀奇哚！」遂向翠凤深深作揖下去，道：「我今朝真真佩服仔耐哉。」翠凤忙低声喝住，笑道：「耐阿怕难为情嗄？拨俚哚来看见仔，算啥？」说著，仍揣住子富的手，说：「倪对过去罢。」挈至房门口，即推子富先行，翠凤随后，同向台面上来。
那时出局已散。黄二姐正帮著金凤等张罗，望见子富，报说：「罗老爷来哉。」朱蔼人道：「倪要吃稀饭哉，耐坎坎来。」子富道：「再豁两拳。」陶云甫道：「耐末倒有趣去，倪搭蔼人吃仔几花酒哚。」子富带笑而告失陪之罪，随叫拿稀饭来。席间如何吃得下，不过意思而已。
当时席散，各自兴辞。子富送至楼梯边，见杨啸庵在后，因想著说道：「我有点小事体，托耐去办办。明朝碰头仔再搭耐说。」啸庵应诺。等到陶云甫、朱蔼人轿子出门，然后汤啸庵步行而归。
罗子富回到房间里，外场已撤去台面，赵家娒把笤帚略扫几帚，和小阿宝收拾了茶碗出去。子富随意闲坐，看翠凤卸头面。
须臾，黄二姐复进房与子富闲谈。翠凤便令取出那祇拜匣来，交与子富。子富乃褪下钏臂，放在拜匣里。黄二姐不解何故，两祇眼汨油油的，看看子富，看看翠凤。翠凤也不理他，子富照旧锁好。翠凤又令黄二姐将拜匣去放在后面官箱里。黄二姐才自明白，捧了拜匣要走，却回头问子富道：「耐轿子阿教俚哚打转去？」子富道：「耐去喊高升来。」黄二姐乃去喊了高升上楼。子富吩咐些说话，叫高升随轿子回公馆去了。随后小阿宝来请翠凤对过房间里去。
翠凤将行，见房里祇剩子富一个，即问：「珠凤呢？」小阿宝道：「无娒教俚哚困去哉。」翠凤看挂钟，已敲过四点，方不言语，便向楼窗口高声喊道：「耐哚人才到仔陆里去哉！」赵家娒在楼下，连忙接应，一径来见子富，问道：「罗老爷，安置罢？」子富点点头。于是赵家娒铺床吹灯，掩门退出。子富直等到翠凤归房安睡。一宿无话。
子富醒来，见红日满窗，天色尚早。小阿宝正拿抹布揩拭橱箱桌椅，也不知翠凤那里去了。听得当中间声响，大约在窗下早妆。再要睡时，却睡不著。
一会儿，翠凤梳好头，进房开橱脱换衣裳。子富遂坐起来，著衣下床。翠凤道：「再困歇㖏，十点钟还勿曾到㖏。」子富道：「耐起来仔啥辰光哉？」翠凤笑道：「我困勿著哉呀，七点多钟就起来哉。耐正来哚䀣头里。」
赵家娒听见子富起身，伺候洗脸、刷牙、漱口。随问点心。子富说：「勿想吃。」翠凤道：「停歇吃饭罢。」赵家娒道：『中饭还有歇哩㖏。」子富道：「等歇正好。」翠凤道：「教俚哚赶紧点。」赵家娒承命去说。子富复叫住，问：「高升阿曾来？」赵家娒道：「来仔歇哉。我去喊得来。」高升闻唤，见了子富，呈上字条一张，洋钱一卷，问：「阿要打轿子？」子富道：「今朝礼拜，无啥事体，轿子覅哉。」因转问翠凤：「倪去坐马车阿好？」翠凤道：「好个。倪要坐两把车哚。」子富也不则声，再看那张条子，乃是当晚洪善卿请至周双珠家吃酒的，即随手撩下。高升见没甚吩咐，亦遂退去。
子富忽然记起一件事来，向翠凤道：「我记得旧年夏天，看见耐搭个长条子客人夜头来哚明园。我勿晓得耐名字叫啥；晓得仔名字，旧年就要来叫耐局哉。」翠凤脸上一呆，答道：「倪勿然搭客人一淘坐马车也无啥要紧，就为仔正月里有个广东客人要去坐马车，我勿高兴搭俚坐，我说：『倪要坐两把车哚。』就说仔一句，也勿曾说啥。耐晓得俚那价？俚说：『耐勿搭客人坐也罢哉；祇要我看见耐搭客人一淘坐仔马车末，我来问声耐看。故末叫勿人味哚。』」子富道：「耐搭俚说啥？」翠凤道：「我啊？我说：『倪马车一个月难得坐转把，今朝为是耐第一埭教得去，我答应仔耐，耐倒说起闲话来哉。我勿去哉，耐请罢。』」子富道：「俚下勿落台哉啘？」翠凤道：「俚末祇好搭我看看哉㖏。」子富道：「怪勿得耐无娒也说耐有点脾气哚。」翠凤道：「广东客人野头野脑。老实说，勿高兴做俚，巴结俚做啥？」
说话之间，不觉到了十二点钟。祇见赵家娒端著大盘、小阿宝提著酒壶进房，放在靠窗大理石方桌上，安排两副杯箸，请子富用酒。翠凤亲自筛了一鸡缸杯，奉与子富，自己男取小银杯，对坐相陪。黄二姐也来见子富，帮著让菜，说道：「耐吃倪自家烧来哚菜水，阿好？」子富道：「自家烧，倒比厨子好。」黄二姐道：「倪有厨子。」随指一碗小火方、一碗清蒸鸭掌，说：「是昨日台面浪个菜。」翠凤向黄二姐道：「耐也来吃仔口罢。」黄二姐道：「覅，我下头去吃。我去喊金凤来陪陪耐哚。」子富道：「慢点去。」遂取那一卷洋钱交与黄二姐，开消下脚等项。黄二姐接了道：「谢谢耐。」子富问他：「谢啥？」黄二姐笑道：「我先替俚哚谢谢，倒谢差哉。」一路说笑，自去分派。
子富因没人在房里，装做三分酒意，走过翠凤这边，兜兜搭搭。翠凤推开道：「快点，赵家娒来哉。」子富回头，不见一人，索性爬到翠凤身上去不依，道：「耐倒骗我！赵家娒搭俚家主公也来哚有趣，阿有啥工夫来看倪？」翠凤恨得咬牙切齿。幸而金凤进来，子富略一松手，翠凤趁势狠命一推，几乎把子富打跌。金凤拍手笑道：「姐夫做啥搭我磕个头？」子富转身，抱住金凤要亲嘴。金凤极声的喊说：「覅噪㖏！」翠凤两脚一跺，道：「耐啥噪勿清爽！」子富连忙放手，说：「勿噪哉，勿噪哉！先生覅动气。」当向翠凤作了个半揖，引得翠凤也嗤的笑了。
金凤推子富坐下，道：「请用酒㖏。」即取酒壶，要给子富筛酒，再也筛不出来；揭盖看时，笑道：「无拨哉。」乃喊小阿宝拿壶酒来。翠凤道：「覅拨俚吃哉，吃醉仔末再搭倪瞎噪。」子富拱手央告道：「再吃三杯，勿噪末哉。」及至小阿宝提了一壶酒来，子富伸手要接，却被翠凤先抢过去，道：「勿许耐吃哉。」子富祇是苦苦央告。小阿宝在傍笑道：「无拨吃哉，快点哭㖏。」子富真个哀哀的装出哭声。金凤道：「拨俚吃仔点末哉，我来筛。」从翠凤手里接过酒壶来，约七分满筛了一杯。子富合掌拜道：「谢谢耐，搭我筛满仔阿好？」翠凤不禁笑道：「耐啥实概厚皮嗄！」子富道：「我说吃三杯，再要吃末勿是人，耐阿相信？」翠凤别转脸不理。小阿宝、金凤都笑得打跌。
子富吃到第三杯，正值黄二姐端了饭盂上楼，叫小阿宝：「下头吃饭去，我来替耐。」子富心知黄二姐已是吃过饭了，便说：「倪也吃饭哉。」黄二姐道：「再用一杯㖏。」子富听了，直跳起来，指定翠凤嚷道：「耐阿听见无娒教我吃？耐阿敢勿拨我吃？」翠凤著实瞅了一眼，道：「越说耐倒越高兴哉！」竟将酒壶授与小阿宝带下楼去，便叫盛饭。黄二姐盛上三碗饭来，金凤自取一双象牙箸同坐陪吃。
一时，赵家娒、小阿宝齐来伺候。吃毕收拾，大家散坐吃茶。珠凤也扭扭捏捏的走来，要给子富装水烟。子富取来自吃。
将近三点钟时分，子富方叫小阿宝令外场去喊两把马车。赵家娒舀上面水，请翠凤捕面。翠凤教金凤去打扮了一淘去。金凤应诺，同小阿宝到对过房里，也去捕起面来。翠凤祇淡淡施了些脂粉，越觉得天然风致，顾盼非凡。妆毕，自往床背后去。赵家娒收过妆具，向橱内取一套衣裳放在床上，随手带出银水烟筒，又自己忙著去脱换衣裳。
金凤先已停当，过来等候。子富见他穿著银红小袖袄，蜜绿散脚裤，外面罩一件宝蓝缎心天青缎滚满身洒绣的马甲，并梳著两角丫髻，垂著两股流苏，宛然是《四郎探母》这一出戏内的耶律公主。因向他笑道：「耐脚也覅去缠哉，索性扮个满洲人，倒无啥。」金凤道：「故是好煞哉，祇好拨来人家做大姐哉。」子富道：「拨来人家末，做奶奶，做太太，阿有啥做大姐个嗄？」金凤道：「搭耐说说末，就无清头哉。」
翠凤听得，一面系裤带出来洗手，一面笑问子富道：「拨耐做姨太太阿好？」子富道：「覅说是姨太太，就做大太太末，也蛮好啘。」复笑问金凤道：「耐阿情愿？」羞得金凤掩著脸伏在桌上，问了几声不答应。子富弯下身子悄悄去问，偏要问出一句话来才罢。金凤连连摇手，说：「勿晓得，勿晓得！」子富道：「情愿哉！」
翠凤把手削脸羞金凤。珠凤坐在靠壁高椅上冷看，也格声要笑。子富指道：「哪，还有一位大太太，快活得来，自家来哚笑。」翠凤一见，嗔道：「耐看俚阿要讨人厌！」珠凤慌的敛容端坐。翠凤越发大怒道：「阿是说仔耐了动气哉？」走过去拉住他耳朵，往下一摔。珠凤从高椅上扑地一交，急爬起来，站过一傍，祇按嘴咽气，却不敢哭。
幸值赵家娒来催，说：「马车来哉。」翠凤才丢开手，拿起床上衣裳来看了看，皱眉道：「我覅著俚。」叫赵家娒开橱，自拣一件织金牡丹盆景竹根青杭宁绸棉袄穿了，再添上一条膏荷绉面品月缎脚松江花边夹裤，又鲜艳又雅净。子富呆著脸祇管看。赵家娒收起那一套衣裳，问子富：「阿要著马褂？」子富自觉不好意思，即取马褂披在身上，说道：「我先去哉。」一径踅下楼来，令高升随去。
出至尚仁里口，见是两把皮篷车，自向前面一把坐了、随后赵家娒提银水烟筒前行，翠凤挈著金凤缓缓而来，去后面坐了那一把。高升也踹上车后踏镫。四轮一发，电掣飙驰的去了。
第八回终。